७५% भागिदारी बायकोची .....

नवरा बायको सुरू करतात नवा नवा संसार
दहा वीस वर्ष जातात त्यातील कळायला सार
नवऱ्यालाही येते कल्पना बायकोच्या महतीची
म्हणून वाटतं, संसारात ७५% भागिदारी बायकोची

कसे जोखमीचे ते नऊ महिने बायको जाते जगून
नवऱ्याच्या घराण्याचा वंशाचा दिवा वाढावा म्हणून
नवऱ्याला कल्पना तरी आहे का त्या अवस्थेची?
म्हणून वाटतं, संसारात ७५% भागिदारी बायकोची.

तीन-चार वर्ष बायकोची, जातात बाळाच्या शी शू ची
नवऱ्याने किती वेळा घातला यांत त्याचा वेळ खर्ची?
कामावरून बोललं कि नवऱ्याला का झोंबते मिरची?
म्हणून वाटतं, संसारात ७५% भागिदारी बायकोची.

किती वेळा नवरा येतो बाहेरूनच काही खाऊन
आणि घरी येऊन रागावतो भाजी अळणी म्हणून
करून दाखवावी नवऱ्याने साधी भाजी बटाट्याची
म्हणून वाटतं, संसारात ७५% भागिदारी बायकोची.

तक्रार, राग, करतानाही नवऱ्याचा जातो किती काळ
माहितीय का त्याला किती लागतं तेल आणि डाळ?
घरी करत नाही जास्त काही, तरी का मर्जी नवऱ्याची?
म्हणून वाटतं, संसारात ७५% भागिदारी बायकोची.

नोकरी करणारी असेल बायको तर हि गंमत पहा
कोणत्या तोंडाने मागतो नवरा आल्या आल्या चहा?
घर व नोकरी अशी दुप्पट सेवा किती आहे महत्वाची?
म्हणून वाटतं, संसारात ७५% भागिदारी बायकोची.

नवराही खरंच खपतो करून मेहनत नोकरी धंदा
पण घरचं व्यवस्थापन नसेल तर होतो मोठा वांदा
करा कल्पना बायकोशिवाय सहल, सणावाराची
म्हणून वाटतं, संसारात ७५% भागिदारी बायकोची.

नवरा काय करतो, ते बायकोने दाखवलय करून
नवऱ्यानेही द्यावं आता आपलं कसब दाखवून
चार चाकाच्या गाडीचीही, फिरतात दोन मागची
म्हणून वाटतं, संसारात ७५% भागिदारी बायकोची.

स्त्री-पुरूष समानतेच्या राहिल्यात नुसत्याच गप्पा
बायको जरा काही बोलली तर नवरा होतो खप्पा
बायको या संस्थेची कुठे आहे नवीन उंची??
म्हणून वाटतं, संसारात ७५% भागिदारी बायकोची !!