Hum Apne Ikhtiyar Ki Hudd Se Guzar Gaye,
Chaaha Tujhe To Pyar Ki Hudd Se Guzar Gaye,

Nafrat Hui Kisi Se to Be-Inteha Hui …
Chaaha To Chahaton Ki Hudd Se Guzar Gaye

Jaagi Hai Apne Dil Main Gulaabon Ki Aarzoo,
Jab Mousam E Bahaar Ki Hudd Se Guzar Gaye,

Uljhay To Talkhiyon Ki Hudd Se Guzar Gaye
Tootay To Kirchiyon Ki Hudd Se Guzar Gaye

Ab Zakhm Haaye Dil Ka Kahaan Tak Shumaar Ho,
Yeh Zakhm To Shumaar Ki Hudd Se Guzar Gaye,

Teri Nigah E Mast Se Ham Itni Pee Gaye,
Itni Ke Har Khumar Ki Hudd Se Guzar Gaye,

Ehsas Mar Chuka Hai Khushi Hai Na Gham Koyi,
Jaise Ke Jeet Haar Ki Hudd Se Guzar Gaye,

Aati Hai Saaf Saaf Nazar Gham Ki Manzilen,
Yeh Qafilay Ghubaar Ki Hudd Se Guzar Gaye,

Hum Ne Khuda Se Kuch Bhi Na Maanga; Magar Tujhe,
Maanga To Siskiyon Ki Hudd Se Guzar Gaye ..